Mikið var um að vera í liðinni viku þegar síðasti stálbitinn af ellefu var hífður upp á þak í aðalsal Tónlistar- og ráðstefnuhússins. Af því tilefni buðu Portus og Austurhöfn til reisugildis en þangað var boðið menntamálaráðherra, borgarstjóra og starfsmönnum ÍAV sem vinna við verkið. Hljómskálakvintettinn lék af þessu tilefni falleg lög sem hljómuðu einstaklega vel í aðalsalnum en hann skipa meðlimir úr Sinfóníuhljómsveit Íslands.

Það var 12.janúar 2007 sem fyrstu steypunni var rennt í mótin í grunni Tónlistar- og ráðstefnuhússins og nú hyllir undir að uppsteypu hússins muni ljúka í nóvember. Fjöldi starfsmanna á svæðinu er um þessar mundir tæplega 300 talsins.

Morgunblaðið/Árni Sæberg