Iðnaðarráðherra heimsótti Hörpuna í liðinni viku til að kynna sér verkefnið nánar og framkvæmdir við það. Óhætt er að segja að meirihluti þeirra iðngreina sem heyra undir Iðnaðarráðuneytið séu við störf í Tónlistarhúsinu, beint eða óbeint. Um 310 manns eru nú við störf á verkstað og fer fjölgandi.

Einnig heimsóttu Hörpuna fyrir skömmu 40 arkitektanemar af fyrsta og þriðja ári Listaháskóla Íslands. Þeir fengu fræðslu um aðdraganda verkefnisins og innsýn í arkitektúr hússins. Það var Færeyingurinn Osbjörn Jacobsen, einn af aðal arkitektum byggingarinnar, sem fór yfir hugmyndafræði hússins og skipulag þess.