Almennar fréttir

02. desember 2005

ÍAV byggir Háskólatorgið

Gunnar Sverrisson forstjóri Íslenskra aðalverktaka og Kristín Ingólfsdóttir rektor Háskóla Íslands undirrituðu samning um hönnun og byggingu Háskólatorgs í hátíðarsal Háskóla Íslands í tengslum við fullveldishátíð stúdenta við Háskóla Íslands. Við sama tækifæri afhenti Guðrún Björnsdóttir, framkvæmdastjóri Félagsstofnunar stúdenta, fyrstu greiðslu samningsins - rúmar 13 milljónir króna - en starfsemi Félagsstofnunar mun flytja í Háskólatorg ásamt fleiri einingum. Samkvæmt samningnum er áætlað að verklegar framkvæmdir hefjist í apríl 2006 og að Háskólatorg verði vígt eftir 24 mánuði, 1. desember 2007.

Íslenskir aðalverktakar, ásamt arkitektastofunum Hornsteinum og teiknistofu Ingimundar Sveinssonar urðu hlutskarpastir í lokaðri samkeppni verktaka og hönnuða um Háskólatorg sem fram fór síðastliðið sumar. Framundan er fullnaðarhönnun bygginganna og áætlað er að verklegar framkvæmdir hefjist í apríl 2006. Neðstu hæðir Háskólatorgs verða steyptar næsta sumar og gert er ráð fyrir að húsunum verði lokað á vormánuðum 2007. Frágangur lóðar fer fram sumarið 2007 og frágangur innanhús haustið 2007. Gangi áætlanir eftir verður Háskólatorg afhent í nóvember 2007 og það vígt 1. desember 2007.

Háskólatorg er samheiti tveggja bygginga, sem með tengibyggingum verða alls um 8.500 fermetrar. Háskólatorg 1, á þremur hæðum, rís á grasflötinni milli Aðalbyggingar og íþróttahúss Háskólans. Háskólatorg 2 sem er á tveimur hæðum, verður reist á bílastæðinu milli Odda, Lögbergs og Nýja Garðs. Alls verður Háskólatorg vinnustaður á þriðja hundrað starfsmanna deilda og þjónustustofnana, þar verða á hverjum tíma rúmlega 1500 stúdentar við nám og störf og daglega munu fleiri hundruð gesta heimsækja Háskólatorg.

Bætt starfsskilyrði fyrir starfsfólk og stúdenta
Háskólatorg leysir úr brýnni þörf í Háskólanum fyrir vinnuaðstöðu kennara, sérfræðinga og stundakennara. Þá er í báðum byggingunum gert ráð fyrir les- og vinnuaðstöðu fyrir á fjórða hundrað stúdenta í grunn- og framhaldsnámi úr öllum deildum skólans. Allt innra fyrirkomulag í nýbyggingunum miðar við sem mestan sveigjanleika, til að þjóna óskum á hverjum tíma um tengsl, samþættingu eða þegar starfsemi breytist.

Fleiri og fjölbreyttari rými til kennslu og rannsókna
Í Háskólatorgi eru fjölbreytt kennslurými í takt við fjölbreytta kennsluhætti rannsóknarháskóla, fyrir um eitt þúsund stúdenta, sem allar deildir Háskólans munu nýta. Þar verða tveir fyrirlestrasalir, hvor fyrir 180 nemendur, tveir 100 manna salir, sérstök umræðustofa fyrir “case study”, rannsóknastofa í hagfræði og sálfræði, aðgengissetur fyrir stúdenta og starfsfólk sem þurfa aðgang að sérhæfðum hugbúnaði og tækjum, tölvuver, smærri fundarstofur, viðtalsherbergi og fleiri rými.

Margvíslegar tengingar
Nýbyggingarnar eru tengdar bæði neðanjarðar frá jarðhæð Háskólatorgs 2 í kjallara Háskólatorgs 1 og úti frá jarðhæð Háskólatorgs 1 til annarrar hæðar Háskólatorgs 2. Þá tengist Háskólatorg 2 norður í Lögberg og í suður til Odda bæði á jarðhæð og annarri hæð. Tveir inngangar í Háskólatorg 2 eru í austur í átt að Nýja Garði og einn í vestur í átt að Árnagarði, til að tryggja greiða umferð þvert á legu Háskólatorgs 2. Aðalinngangur í Háskólatorg 1 er frá Alexanderstíg en jafnframt er fyrirhugaður inngangur úr vestri sem verður tengdur almennum umferðargöngum undir Suðurgötu. Þessu til viðbótar hefur verið óskað eftir við arkitekta bygginganna að huga að frekari tengingum við Nýja Garð og Árnagarð. Með tengingum nýrra bygginga og eldri eru sköpuð skilyrði fyrir flæði, tengsl og samneyti fólks á ólíkum sviðum og til að mynda eitt frjótt samfélag Háskólans.

 

 

 

 

Twitter Facebook
Til baka

Framkvæmdir við Brimketil - áfanga 2
21. júní 2022

Framkvæmdir við Brimketil - áfanga 2

Framkvæmdir við Brimketil áfanga 2 gengu vel þrátt fyrir erfiðar aðstæður vegna brims og flóðs. ÍAV sá um að stækka útsýnispallinn þannig að fólk komist nær stóra Brimkatlinum og bæta aðgengi að stiga. Verk lauk í byrjun júní.

Njálsgata 65
24. maí 2022

Njálsgata 65

Það líður að verklokum á Njálsgötu 65. Verk hófst nóvember 2021. Um er að ræða 12 innréttaðar íbúðri og uppsetning á flóttastiga. Verkkaupi er Félagsbústaðir og húsnæðið er ætlað sem endurhæfingarhúsnæði fyrir konur, sem hafa lent í félagslegum áföllum af ýmsu tagi. Þarna mun hver einstaklingur dvelja í um tvo til þrjá mánuði.

Skíðalyftur í Bláfjöllum - fyrsta skóflustungan
28. apríl 2022

Skíðalyftur í Bláfjöllum - fyrsta skóflustungan

ÍAV tekur þátt í byggingu tveggja nýrra skíðalyfta í Bláfjöllum. Lyfturnar heita Gosi, sem verður á Suðursvæði, og Drottning, sem verður við Kóngsgil. Þær munu leysa af hólmi eldri lyftur sem bera sömu nöfn. Um er að ræða fjögurra sæta stólalyftur og er verkið er unnið í samstarfi við austuríska lyftuframleiðandann Doppelmayr, sem jafnframt er aðalverktaki verksins. ÍAV mun sjá um jarðvinnu, steypu á undirstöðum fyrir möstur og endastöðvar ásamt reisingu stálgrindarhúsa yfir botnstöðvum og stólageymslu o.fl. Doppelmayr mun síðan sjá um uppsetningu sjálfra lyftanna og alls búnaðar tengdum henni. Fyrsta skóflustunga var tekin núna í vikunni og eru framkvæmdir því formlega byrjaðar.

Fréttasafn