Almennar fréttir

06. júní 2008

ÍAV byggja kerskála í Helguvík

ÍAV byggja kerskála í Helguvík

Verður fyrsta álverið í heiminum sem eingöngu er knúið jarðvarmaorku

Norðurál og Íslenskir aðalverktakar (ÍAV) undirrituðu í dag samninga um byggingu kerskála fyrir álver Norðuráls í Helguvík. Um leið var fyrsta skóflustungan að kerskála tekin formlega að viðstöddu fjölmenni. Undirbúningsframkvæmdir á lóð fyrirtækisins eru hafnar og byggingarframkvæmdir við kerskála hefjast á þessu ári. Framkvæmdirnar fela m.a. í sér aðstöðusköpun á vinnusvæðinu, jarðvinnu, uppsteypu, forsteyptar einingar, stálvirki, klæðningar og ýmsan frágang.

Heildarkostnaður við fyrsta áfanga álversins, sem tekinn verður í gagnið fyrir árslok árið 2010, nemur um 70 til 80 milljörðum íslenskra króna. Ef miðað er við álverð í dag er áætlað útflutningsverðmæti þegar fyrsti áfangi verður kominn í fullan rekstur um 35 milljarðar á áriStarfsmannafjöldi verður um 400 manns og að auki skapast afleidd störf í samfélaginu fyrir um 600 manns til viðbótar.

Íslensk áhersla

Ragnar Guðmundsson, forstjóri Norðuráls, fagnar þessum áfanga og væntir góðs af samstarfinu við ÍAV. “Íslenskir aðalverktakar hafa víðtæka reynslu af stórum framkvæmdum og fyrirtækið á rætur sínar hér á Suðurnesjum.” Að sögn Ragnars er það ánægjuefni að álverið í Helguvík verður fyrsta álverið heiminum sem eingöngu er knúið raforku frá jarðvarma. “Á Grundartanga byggðum við í samstarfi við Orkuveitu Reykjavíkur og Hitaveitu Suðurnesja fyrstu kerlínuna sem eingöngu er knúin jarðvarmaorku. Öflug samvinna við þessi fyrirtæki hefur fætt af sér nýja þekkingu allra hlutaðeigandi og skapað ný sóknarfæri. Undirbúningur verkefnisins í Helguvík hefur einkennst af afar góðu samtarfi við orkufyrirtækin og heimamenn og stuðningur Suðurnesjabúa hefur verið mikill. Miklar kröfur eru gerðar til okkar, t.d. í umhverfismálum og útlitshönnun, en það hefur verið gaman að vinna að lausnum á slíkum málum með heimafólki. Niðurstaðan verður álver í allra fremstu röð sem við getum verið mjög stolt af.”

Gunnar Sverrisson, forstjóri Íslenskra aðalverktaka, segir verkefnið í Helguvík koma á góðum tíma fyrir byggingariðnaðinn og íslenskt samfélag. „Talsvert hefur dregið úr framkvæmdum á hér á landi í framhaldi af verklokum í stórframkvæmdum á austurlandi. Einnig hefur hægt á íbúðamarkaðnum síðustu mánuði. Við hjá ÍAV erum með góða verkefnastöðu um þessar mundir og bygging Álvers í Helguvík fyrir Norðurál kemur til með að tryggja áframhald þar á. Ég tel að tilkoma álvers í Helguvík sé dæmi um þjóðhagslega hagkvæmt verkefni sem kemur með innspýtingu í efnahagslífið á hárréttum tíma og gefur hagkerfinu tækifæri á mýkri lendingu en ella og án þess að valda þenslu eða skekkja íslenskan vinnumarkað“.

Ný meginstoð atvinnulífs

Oddný Harðardóttir, bæjarstjóri í Garði, áréttar mikilvægi verkefnisins í Helguvík fyrir atvinnusvæði álversins sem spannar allt frá Vogum og Grindavík til Sandgerðis, Reykjanesbæjar og Garðs. “Öll sveitarfélög á svæðinu hafa lýst yfir stuðningi við byggingu álversins og stuðningur meðal almennings er mikilli. Ég verð vör við sívaxandi eftirvæntingu hjá mínu fólki og þar er auðvitað horft til þeirrar kjölfestu í atvinnu og þeirra tekjumöguleika sem álverið mun skapa þegar sjávarútvegurinn er að gefa eftir. Hér býr raunsætt fólk sem veit hvað það kostar að lifa mannsæmandi lífi og mennta börnin sín. Stöðugleiki í atvinnuframboði leiðir ósköp einfaldlega af sér stöðugra og betra samfélag.”

Árni Sigfússon, bæjarstjóri í Reykjanesbæ, tekur í sama streng. “Hér ríkir mikill einhugur um uppbyggingu álvers Norðuráls í Helguvík. Það eru jafnt fyrirtæki og einstaklingar hér á Suðurnesjum sem þrýsta á um sem skjótastan framgang verkefnisins. Í þessum hópi er t.d. áberandi fólk sem þarf nú að sækja vinnu um langan veg eða hefur ekki fullnægjandi atvinnu og tekjur. Væntingarnar eru að sönnu miklar en auðvitað er undirbúningsferlið langt og strangt. Á móti er það sanngjörn krafa að svona vel undirbúið og þjóðhagslega mikilvægt verkefni, sem styrkir undirstöður atvinnulífs, tryggir innstreymi erlends gjaldeyris og eykur tiltrú útlendinga á íslensku efnahagslífi, njóti sannmælis.”

Twitter Facebook
Til baka

Áfanga ll - Stapaskóli
22. september 2021

Áfanga ll - Stapaskóli

ÍAV hefur undirritað samning við Reykjansbæ um uppbyggingu á áfanga ll við Stapaskóla á Dalsbraut 11-13. Flatarmál stækkunarinnar er 5600 m2 og mun stækkunin hýsa fullbúið íþróttahús sem rúmar fullan keppnisvöll í körfubolta með allt að 1.200 áhorfendur og 25 metra innisundlaug ásamt heitum pottum. Vinnan hefst strax og afhending verður 15. desember 2022.

Fjölnota Íþróttahús í Garðabæ
20. september 2021

Fjölnota Íþróttahús í Garðabæ

Framkvæmdir á fjölnota íþróttahúsi Garðabæjar ganga vel. Unnið er að glugga ísetningu sem er komin langt á veg og byrjað er að klæða húsið. Verið er að ganga frá samning um bílastæði við íþróttahúsið en búið er að gefa leyfi á að hefja framkvæmdir og munu þær hefjast í þessum mánuði. Innanhússfrágangur inni í sal er einnig á fullu og stefnt er að því að klára allan þann frágang í október og í kjölfari leggja niður gervigrasið. Búið er að flísaleggja stóran hluta veggja og stefnt er að því að klára gólfflísar í október. Í kjölfari koma innréttingar, bekkir og snagar inn. Um er að ræða 10.000 fm salur en alls 17.000 fm hús. Afhenda á íþróttahúsið um miðjan desember.

Framkvæmdir hafnar í Hraunbæ
13. ágúst 2021

Framkvæmdir hafnar í Hraunbæ

ÍAV undirrituðu þann 4. júní 2021 s.l verksamning sem felur í sér að ÍAV byggi og afhendi alls 64 almennar leiguíbúðir við Hraunbæ 133. Samtals eru 59 íbúðir í tveimur 3-5 hæða blokkum með 4 stigagöngum, auk þess raðhús á tveimur hæðum með 5 íbúðum. Nú eru framkvæmdir hafnar. Jarðvinnan byrjaði í júlí og fyrstu smiðir komu á staðinn á mánudaginn og þá hófst uppsteypa.

Höfuðstöðvar Vegagerðarinnar afhentar
29. júlí 2021

Höfuðstöðvar Vegagerðarinnar afhentar

Um miðjan júní hóf Vegargerðin að flytja inn í nýjar höfðuðstöðvar í Suðurhrauni 3 í Garðabæ og flutti endanlega alla starfsemi sína í húsið í byrjun júlí. Um er að ræða 3000 m2 skrifstofubyggingu á þremum hæðum auk 2400 m2 lager og tækjageymslu á 9.000 m2 lóð.

Fréttasafn