ÍAV sjá um byggingaframkvæmdir í Skugganum
ÍAV og 101 Skuggahverfi hafa undirritað samstarfssamning um byggingaframkvæmdir við annan áfanga Skuggahverfis. Á byggingareitnum rísa fimm íbúðarhús með 97 íbúðum. Framkvæmdir eru þegar hafnar. Áhugasamir kaupendur geta skráð sig á heimasíðu 101 Skuggahverfis, www.101skuggi.is.
„Við erum ákaflega ánægðir með þetta samstarf og finnst spennandi að fá að taka þátt í uppbyggingu miðborgarinnar með þessum hætti. Byggingarnar munu setja glæsilegan svip á strandlínu borgarinnar“ sagði Gunnar Sverrisson, forstjóri Íslenskra aðalverktaka: „Það er ekki á hverjum degi sem ráðist er í jafn mikla uppbyggingu í Reykjavík á einu bretti. Íslenskir aðalverktakar hafa sýnt það í gegnum árin að fyrirtækið er mjög vel í stakk búið til þess að takast á við verkefni af þessari stærðargráðu enda fá verktakafyrirtæki á Íslandi sem hafa yfir jafn mikilli reynslu að ráða.”
Byggingarsvæðið afmarkast af Skúlagötu, Frakkastíg, Lindargötu og Vatnsstíg. Hæsta byggingin mun standa við Vatnsstíg og verður 63 metrar eða 19 hæðir. Þá munu tvær lægri byggingar standa við sömu götu, sem verða annars vegar átta hæða og hins vegar þriggja hæða. Við Lindargötu verða síðan tvær byggingar, önnur þriggja hæða en hin 11 hæða. Húsasamstæðurnar verða tengdar saman neðanjarðar með bílageymslum á þremur hæðum, en samtals verða rúmlega 250 bílastæði í öðrum og þriðja áfanga.
Byggingastjóri er Oddur H. Oddsson og verkefnisstjórar Guðmundur Karl Marinósson og Heiðar Ásgeirsson.
