ÍAV sjá um innanhúsfrágang á Borgartúni 26
-
Á myndinni takast í hendur Oddur Víðisson framkvæmdastjóri Þyrpingar og Gunnar Sverrisson forstjóri ÍAV með Kristján Arinbjarnar framkvæmdastjóra framkvæmdasviðs sér á vinstri hönd.
Undirritaður hefur verið samningur milli ÍAV og Þyrpingar þess efnis að ÍAV sjái um frágang á skrifstofu- og verslunarhúsnæði í eigu Þyrpingar sem stendur við Borgartún 26. Verkið nær til alls efnis, flutninga og vinnu sem þarf til að ljúka verkefninu að fullu ásamt rekstri vinnustaðarins og allri stjórnun á byggingastað.
ÍAV hófu í september 2005 vinnu við byggingu hússins. Húsið skiptist í tvo misháa hluta, fimm og átta hæða, að auki er hálf hæð ofan við lyftuturn fyrir tæknirými. Fyrir miðju húsi er aðalstigahús með þremur lyftum. Stigahús eru einnig við vesturenda og á austurgafli. Hluti hússins er einangraður að utan með ýmsum gerðum af klæðningum, einnig er hluti hússins sjónsteypa sem einangruð að innan. Húsið er um 12.000 fermetra stórt með 345 bílastæðum, þar af verða 200 bílastæði niðurgrafin.
