ÍAV tekur þátt í gerð Kröflulínu 3
Framkvæmdir við gerð Kröflulínu 3 hafa staðið yfir síðan í sumar. Um er að ræða nýja háspennulínu í lofti frá tengivirki Kröfluvirkjunar við Mývatn að tengivirki Kárahnjúkavirkjunar í Fljótsdal, alls um 120 km leið. Mun hún að mestu vera meðfram Kröflulínu 2 sem er þarna fyrir. Línuleiðinni var skipt niður í þrjá hluta og sér ÍAV um jarðvinnu á miðjuhlutanum sem teygir sig um 56 km leið frá Jökulsá á Fjöllum að Jökulsá á Dal. Verkið felst í að gera vegslóða og reisingarplön við mastursstæðin, setja niður undirstöður fyrir möstrin úr forsteyptum einingum og borun og innsetningu bergbolta sem verða notaðir sem stagfestur fyrir möstrin. Meðalhæð vinnusvæðisins er 533 m.y.s. en hæst nær það í 678 m.y.s.
Verkkaupi er Landsnet.
