Framvinda við snjóflóðavarnargarða í Bolungarvík
Frá áramótum hafa fjórir starfsmenn unnið við snjóflóðavarnargarðana í Bolungarvík en starfsmönnum fækkaði um miðjan desember. Nú er unnið við skeringar við keilur sem eru ofan við snjóflóðavarnargarðana en þar hafa um 20 þúsund m3 af efni verið færðir til á síðustu vikum.
Einnig er unnið við gerð göngustíga upp á aðalvarnargarðinn en sá er um 700 m langur. Efnið sem sprengt hefur verið úr fjallinu og fjarlægt, hefur að mestu leyti verið óhæft til fyllingar í garðana. Tuttugu metra hátt berg var áður á því svæði sem nú hefur verið sprengt í burtu. Þar er nú aflíðandi brekka sem sáð verður í.
Áætlað er að framkvæmdir muni stöðvast fljótlega en byrjað verður að nýju þegar vora tekur. Veður hefur að mestu verið skaplegt í janúar og tiltölulega lítill snjór miðað við árstíma.
Næsta sumar verður áhersla lögð á frágang við garðana. Sett verður upp öryggisgirðing eftir endilöngum görðunum, lagðir verða göngustígar, gerðir útsýnispallar og náttúrugrjót lagt.
Ennfremur verður lokið við grindar- og fyllingarvinnu við garðana sjálfa en þegar er búið að framkvæma um 95% af þeim hluta. Áætlað er að um 10 manns vinni við verkið næsta sumar og verklok eru fyrirhuguð í lok ágúst 2012.
