Fyrstu steypunni rennt í mót Tónlistar- og ráðstefnuhússins
Tímamót urðu í undirbúningi byggingar Tónlistar- og ráðstefnuhússins við Austurhöfn í Reykjavík þann 12. janúar 2007, þegar fyrstu steypunni var rennt í mót í grunni hússins við hátíðlega athöfn að viðstöddu fjölmenni.
Ísleifur Sveinsson byggingastjóri ÍAV stýrði verkinu og fékk sér til halds og trausts Björgólf Guðmundsson, stjórnarformaður Eignarhaldsfélagsins Portus, Stefán Þórarinsson, formaður verkefnastjórnar, borgarstjóra Vilhjálmur Þ. Vilhjálmsson, Þorgerði Katrínu Gunnarsdóttur menntamálaráðherra og Sturlu Böðvarsson, samgönguráðherra.
Tónlistar- og ráðstefnuhúsið er fyrsta sérhannaða húsið af þessari stærð hérlendis fyrir tónleika- og ráðstefnuhald. Með athöfninni hófst nýr kafli í langri sögu þessa stóra og mikla mannvirkis, sem á eftir að setja mikinn svip á miðborg Reykjavíkur.
Á byggingareitnum sem tengist Tónlistar- og ráðstefnuhúsinu rís 400 herbergja hótel, verslunar- og skrifstofuhúsnæði svo og nýjar höfuðstöðvar Landsbankans.
Tónlistar-og ráðstefnuhúsið verður heimili Sinfóníuhljómsveitar Íslands. Bylting verður í aðstöðu til tónleikahalds á Íslandi með byggingu hússins. Ráðstefnuhaldi skapast einstök aðstaða með húsinu sem mun styrkja verulega ráðstefnu- og ferðaþjónustu í landinu og opna ný og spennandi tækifæri.
