Heilög Barbara heiðruð
Jarðgangagerðarmenn Ósafls í Bolungarvík héldu daginn, 4. desember, hátíðlegan og fögnuðu degi heilagrar Barböru, verndardýrlings námumanna. Starfsmenn Ósafls eru margir hverjir kaþólskir og þótti við hæfi að sameina hátíðarhöld tengd Barböru við jólahátíðina. Byrjað var á því að fara inní göng og þar voru tvær styttur blessaðar af kaþólskum presti og annarri komið fyrir í þar til gerðum skáp svo að líkneski af Barböru blasir við þegar keyrt er í göngin.Eftir nokkur ræðuhöld söng karlakórinn Ernir nokkur lög. Starfsmenn Ósafls efndu til veislu þar sem glæsilegar veitingar voru í boði eftir athöfnina á framkvæmdasvæði Ósafls við Ós í Bolungarvík.
Barbara gegnir viðamiklu hlutverki í kaþólskri trú en hún er verndari námumanna, vopnasmiða, steinsmiða, jarðfræðinga og flugeldatækna. Þá þykir hún góð til fyrirbæna hjá slökkviliðsmönnum, múrurum og vitavörðum. Einnig sinnir hún sjúkum og verndar þá gegn eldi.
Heilög Barbara er sögð hafa fæðst árið 218 í borginni Nicomedia í Tyrklandi. Rómverski harðstjórinn Dioscorus var faðir hennar. Barbara þótti afar fögur en Dioscorus vildi halda henni frá girndaraugum vonbiðla. Dag einn þegar hann kom heim eftir langa fjarveru komst hann að því að Barbara hafði gerst kristin og sótt skóla hjá kristnum lækni. Dioscorus skipaði þegar í stað að láta reisa sérstakt hús fyrir Barböru þar sem hún skyldi höfð í stofufangelsi. En Barabara veitti viðnám. Hún lét smiði fjölga gluggum svefnherbergisins úr tveimur í þrjá, en það átti að undirstrika trú hennar. Einnig neitaði hún að giftast þeim manni sem faðir hennar hafði valið handa henni. Þetta og fleira varð til þess að Barbara var dæmd til dauða og skyldi hún hálshöggvin. Þar sem faðir Barböru stóð yfir líki dóttur sinnar eftir að hafa sjálfur höggið höfuð hennar af með sverði, laust eldingu í sverðið og dó hann samstundis.Á þetta var litið sem teikn um hefnd guðs.
