Samningur um stækkun Lagarfossvirkjunar undirritaður
ÍAV og RARIK hafa undirritað samning um byggingarhluta fyrir stækkun Lagarfossvirkjunar. Að afloknu útboði var ákveðið að ganga til samninga við ÍAV og hinn 14. mars s.l. gaf RARIK því út svokallað veitingarbréf þeim til handa. Undirritun verksamnings fór fram föstudaginn 8. apríl 2005.
Verkefnið felur í sér stækkun stöðvarhúss til norðurs, nýtt inntak norðan við það sem fyrir er og þrýstivatnsstokk á milli nýja inntaksins og stöðvarhúsviðbyggingar. Ennfremurrýmkun aðrennslisskurðar með tilheyrandi vatnsvarnarvirkjum og stíflugerð, ásamt öðrum tengdum verkum sem falla undir verksamning.
Útboð á byggingarhluta var auglýst um miðjan desember 2004. Tilboð voru opnuð þann 14. febrúar 2005 og bárust fimm tilboð. Verkfræðistofa Sigurðar Thoroddsen hf. yfirfór tilboðin með RARIK og var fundað fyrst með lægstbjóðendum Keflavíkurverktökum og Héraðsverki ehf. sem féllu frá sínu tilboði. Í kjölfarið var fundað með ÍAV og náðist fljótlega samkomulag sem leiddi til töku tilboðs ÍAV. Samningsverð er 838,3 mkr. sem er um 75,3% af kostnaðaráætlun. Gert er ráð fyrir að framkvæmdir hefjist í apríl 2005 og verði lokið í maí 2007. Að jafnaði munu 20-30 starfsmenn frá ÍAV vinna við bygginguna. Verkefnastjóri er Jón Leví Hilmarsson.
