Til hamingju með nýjar snjóflóðavarnir!
Ósafl hefur nú lokið vinnu við gerð snjóflóðavarna í Bolungarvík. Áfram mun þó verða haldið með uppgræðslu gróðurs í görðunum og frekari snyrtingu umhverfis varnargarðana. Formleg vígsla þeirra er áformuð á næsta ári.
Ósafl hóf gerð Bolungarvíkurganga fyrir ríflega 5 árum og síðar bættist við vinna við snjóflóðavarnirnar. Á þeim tíma hefur fjöldi Bolvíkinga ásamt öðrum Vestfirðingum starfað hjá fyrirtækinu og fjölmargir undirverktakar. Þá hefur fyrirtækið átt í samstarfi við ýmsa þjónustuaðila af Vestfjörðum vegna afleiddra starfa í tengslum við verkefni Ósafls. Það er því stór hópur fólks sem á þátt í gerð mannvirkjanna.
Ósafl vill nota tækifærið og þakka starfsfólki sínu, samstarfsfólki og öllum Bolvíkingum fyrir gott samstarf, góðar móttökur og mikinn velvilja í garð fyrirtækisins.
Starfsfólk Ósafls
