Vöruhótelið tilbúið til notkunar
Starfsmenn Íslenskra aðalverktaka (ÍAV), ásamt undirverktökum, hafa lokið við hönnun og byggingu glæsilegs Vöruhótels Eimskips við Sundahöfn.
Í mars 2002 var undirritaður samningur milli ÍAV og Eimskips um hönnun og byggingu hússins. Vöruhótelið er stálgrindarhús, grunnflötur er um 17.500 fermetrar. Í húsinu er milligólf um 5.200 fermetrar. Húsið er stærsta hús í Reykjavík í rúmmetrum talið eða um 300.000 rúmmetrar að stærð. Frí lofthæð í aðalsal er 15 metrar og ná hillukerfi upp í þá hæð. Öll hönnun hússins er hluti af samningi og hófst hún í mars ásamt aðstöðusköpun og undirbúningi. Jarðvinna hófst í byrjun apríl og uppsteypa í byrjun maí. Reising stálgrindar hófst í lok júlí og var húsið fokhelt í lok október. Húsið er nú tilbúið til notkunar.