Vör valin besta farþegamiðstöð Evrópu – glæsileg viðurkenning fyrir íslenskt mannvirki
Farþegamiðstöðin Vör við Skarfabakka í Reykjavík hefur hlotið alþjóðlegu verðlaunin Europe’s Best Cruise Terminal 2026 á World Cruise Awards. Viðurkenningin er einstakur áfangi fyrir íslenska hafnarstarfsemi og mikið fagnaðarefni fyrir alla þá sem komu að uppbyggingu þessa glæsilega mannvirkis.
Vör var valin besta farþegamiðstöð Evrópu í samkeppni við 13 aðrar farþegamiðstöðvar, meðal annars í Barcelona, Amsterdam, Lissabon og Osló. Verðlaunin voru afhent við hátíðlega athöfn á Jamaíka þann 12. október síðastliðinn og er þetta í fyrsta sinn sem íslensk farþegamiðstöð hlýtur þessa viðurkenningu.
Metnaðarfullt verkefni og öflugt samstarf
Íslenskir aðalverktakar (ÍAV) sáu um hönnun og byggingu farþegamiðstöðvarinnar í samstarfi við VSÓ Ráðgjöf og Brokkr Studio arkitekta, fyrir Faxaflóahafnir.
Framkvæmdin var metnaðarfull og kallaði á fjölbreytta sérþekkingu, vönduð vinnubrögð og öflugt samstarf fjölmargra aðila. Að baki mannvirkinu liggur mikil vinna, útsjónarsemi og fagmennska þeirra sem komu að verkefninu, allt frá fyrstu skrefum hönnunar til verkloka.
Vör var formlega opnuð í maí 2026 og hefur því hlotið þessa glæsilegu alþjóðlegu viðurkenningu á sínu fyrsta starfsári.
Mannvirki sem vekur athygli út fyrir landsteinana
Vör er fyrsta sérbyggða farþegamiðstöð skemmtiferðaskipa á Íslandi og markar mikil tímamót í uppbyggingu hafnaraðstöðu í Reykjavík. Byggingin sameinar nútímalega hönnun, fjölbreytta nýtingarmöguleika og aðstöðu sem mætir þörfum farþega og hafnarstarfsemi.
Alþjóðlega viðurkenningin er ánægjuleg staðfesting á því hversu langt íslensk hönnun, verkþekking og framkvæmdageta geta náð.
Stolt af okkar fólki
Við hjá ÍAV erum einstaklega stolt af því að hafa átt þátt í uppbyggingu Vör. Viðurkenningin er ánægjulegur áfangi og endurspeglar þann metnað og góða samstarfsvilja sem einkenndi verkefnið frá upphafi.
Við viljum því sérstaklega þakka okkar frábæra starfsfólki og öllum samstarfsaðilum sem lögðu hönd á plóg við framkvæmdina. Það er ánægjulegt að sjá afrakstur þeirrar vinnu hljóta jafn glæsilega viðurkenningu á alþjóðlegum vettvangi.
Innilegar hamingjuóskir til Faxaflóahafna og allra sem komu að verkefninu!
